«Արցախյան կյանք» սոցիալական բնակարանաշինական ծրագիրը մշակել և նախաձեռնել է «Project Manager Housing» ընկերությունը, որն իրականացնում է առանձնատների շինարարական ամբողջ գործընթացի կառավարում։ Սույն ծրագրով PMH-ը ԼՂ-ից տեղահանված քաղաքացիներին առաջարկում է արտոնյալ պայմաններով առանձնատների ձեռքբերում և համալիր ծառայությունների փաթեթ՝ ՀՀ քաղաքացիություն ստանալուց մինչև հողատարածքի ձեռքբերում և կառուցապատման վերահսկում։ Այսպիսով, ողջ գործընթացի իրավական, տեխնիկական և վարչարարական վերահսկումը ստանձնում են ընկերության մասնագետները։

Ծրագրի իրականացման նպատակով «Project Manager Housing» ընկերությունն անցկացրել է շինարարական կազմակերպությունների ներքին մրցույթ։ Արդյունքում, ընտրվել է առավել հուսալի և արժանահավատ առաջարկ ներկայացրած «Yerevan Line» շինարարական ընկերությունը, որի աշխատանքների վերահսկումը և անհամապատասխանությունների շտկման գործընթացը կառավարելու է «Project Manager Housing»-ը։

«Արցախյան կյանք» նախագծում ներգրավված է նաև «INGO Armenia» ապահովագրական ընկերությունը՝ որպես գործընկեր։ Այն առանձնատները, որոնց կառուցման ընթացքը կվերահսկի «Project Manager Housing»-ը, կապահովագրվեն «Ingօ Armenia»-յի կողմից։ Մեկ տարվա ապահովագրումը պարտադիր է՝ հետագա հնարավոր ռիսկերի դեպքում առաջացած թե՛ շինարարական, թե՛ կոսմետիկ վնասների համար ֆինանսական հատուցում ստանալու նպատակով։

PMH-ը նախատեսում է 500-1000 առանձնատան կառուցում ՀՀ մարզերում։ Ծրագրի իրազեկման արշավի համար կհատկացվի առնվազն 3 ամիս։ Շինարարական աշխատանքների ավարտի վերջնաժամկետը՝ 30.12.2027թ։